नेपालमा परापुर्व काल देखिनै रेविज रोगको प्रकोप देखा पर्ने गरेको र हाल वर्षेनी १०० जना भन्दा बढि मानिस तथा ३०० भन्दा बढि पशू यस रोगबाट मर्ने गरेको अभिलेख पाईन्छ । रेविज रोग प्राणघातक भए पनि समयमै खोप लगाउन सकेमा यो रोग लाग्नबाट बच्न र बचाउन सकिन्छ । यो रोगको एक पटक लक्षण देखा परी सकेपछि कूनै उपचार गर्न सकिदैन र रोगीको मृत्यू पक्का हून्छ । विश्वका खासगरी एसिया र अफ्रिकाका करिव ७५ वटा देशहरुमा यस रोगको प्रकोप देखिने गरेको छ र ती देशहरुमा वर्षेनी करीव ५५ हजार मानिसहरुको रेविज रोगका कारण मृत्यू हूने गर्दछ ।

देशमा देखिने गरेको रेविज रोगको प्रकोपलाई कम गरी जनस्वास्थ्यको संरक्षण गर्न मुलुक भीत्रै रेविज भ्याक्सिन उत्पादन गर्नु पर्ने आवश्यकता महसुस गरी स्थापना भएको यस प्रयोगशालाले विश्व स्वास्थ्य संगठन तथा पशु स्वास्थ्यको लागि विश्व संगठनको मापदण्ड अनुसार सेल कल्चर प्रविधीवाट एन्टी रेविज खोप उत्पादन गर्दै आएको छ । सीमित श्र्रोत, साधन र जनशक्ति भएको हालको स्थितिमा यस प्रयोगशालाले वार्षिक करिव ४० हजार डोज रेविज भ्याक्सिन उत्पादन गर्दै आएको छ । सानै परिमाणमा भएपनि यस प्रयोगशालावाट उत्पादित यस खोपले देशमा रेविज रोगको प्रकोपलाई कम गर्न महत्वपुर्ण योगदान दिंदै आएको छ । यसका साथै कुकुरमा रेविज रोगको प्रकोप कम गर्नमा सहयोग गरी अप्रतक्ष्य रूपमा यस खोपले मानिसमा पनि रेविज रोगको प्रकोप कम गर्न महत्वपुर्ण योगदान गर्दै आएको छ ।

यसका साथै यस प्रयोगशालामा सन् २००६ देखि नेै मानव प्रयोजनको लागि रेविज भ्याक्सीनको परिक्षण उत्पादन गर्ने कार्य पनि हूदै आएको छ । हाल उक्त कार्यमा उल्लेखनीय प्रगति भएको छ र अबको केहि वर्षमा उक्त भ्याक्सीनको व्यापारिक उत्पादन कार्य शूरु हूने अवस्थामा रहेको छ ।